ලොක්කගේ පැල්පත

Thursday, September 22, 2016

රැවටීම

සොඳුර !

මා ප්‍රිය මැස්සිය !
එන්න..
අවුදින්
පැටලෙන්න...

මේ
මා ස්නේහය
කැටිකොට,
ආදරය
මුසු කොට,
පාරිශුද්ධ
ඔබ වෙනුවෙන්ම
වියන ලද්දාවූ
ප්‍රේමයේ
උත්තුංග
මායා දැලයි...

ඒ නිසාවෙන්
එන්න....

Tuesday, September 13, 2016

පැන්සල් කොටේ

අනිත් එවුන්ව
උගතුන් කරන්න
කඹුරලා කඹුරලා
ගෙවිච්ච මට
අන්තිමේදී
ඉතුරු උනේ

උන් මහත්තුරු වෙන්න
තටමපු තැටමිල්ලෙදි
ඇඟිලි අස්සෙ
හිර කොරගෙන
විකපු මගේ
පස්ස ගාතෙ
ශේෂ උනු
දත් පාරවල් විතරයි...

Monday, September 12, 2016

කියාගන්න බැරි
ගොඩක් දේවල්
මලු බැඳන්
ඉන්න හැටි
මගෙ හිත...

ඒ එක එක
ලිහා බලන්න
අත තිබ්බත්
පපුවට...

හැමදාම දැණුනු
ලබ්ඩබ් හඬ
විතරමයි
ඇහෙන්නේ....
දැනෙන්නේ.....

මේක නම්
වෙන්න බෑ.....
විශ්වාසත් නෑ...

හිටු ටිකක් මං
රැගෙන එමි
හොඳ කැපෙන පිහියක්...

රැගෙන විත්
හද පලමි
සැක දුරු කරනු වස්...

හිත !
ඔන්න උඹ මාට්ටු
එතකොට මම??

Thursday, September 1, 2016

තමන්ගෙ මැට්ටම්

කවුරු කොහොම කිව්වත්
උඹ හිනාවෙන දේටම
මටත් හිනා යන නිසා ,
උඹ අඬන කොට
මටත් ඇඬෙන නිසා,
උඹෙයි මගෙයි වෙනසක්
මට දැනිලත් නෑ....
මම දන්නෙත් නෑ...
කොටින්ම කිව්වොත්
අදාළම නෑ.....

Monday, August 29, 2016

ඒකෙත් හැටි

පාළුම පාළු කතරක
විඩාබරව
දිය බිඳකුදු නැතිව
ඔහු ගමනේ ය...

එවිට පෑයු
ගණදුරු
මේඝ වලාව
අන් කිසිවෙකු නොව;
නුඹ ය...

ගුගුරුවා අහස
වැසි වස්වන බව
හුදෙක් මවා පෑවේ
රැවටුවේ
අන් කිසිවෙකු නොව;
නුඹම ය...

පිපාසයෙන්
පණ අදින ඔහු
නොතකා , නපුරුව
දිය පොදක් නොදී
අකුණු ගසමින්
මැකී ගියෙත්
අන් කිසිවෙකු නොව;
නුඹම යි...

එහෙව් නුඹවම
ඔහූ පැතූ අරුමය
පුදුමයි..!

Tuesday, August 23, 2016

එන්නෙ නෑමයි

හිරු නොමැතිව
මලක් නොපිපේ
ලොවම දන්නා
සත්‍යයකි එය..

එසේ වූවත්
සුළං රැල්ලක්
ඇවිදින් ඇහුවොත්
"එනවද යන්න?"

ලොවේ සුපිපුණ
මල් දරන්නේ
නොයෙක් විදිහේ
අදහස් ය...

බොහෝ මල්
කියන්නාහු ය
"යමු යමු..අනේ යමු"

ඒ අතරිනුත්
එක් මලක් හෝ
වෙයි මෙසේ
පිළිතුරු දරන..

"හිරුට පිටුපාන
කිසිදු ගමනකට
එන්නෙ නෑ මං
එන්නෙ නෑමයි"

Friday, August 12, 2016

ටටා Bye

පෙර දවසක
උදෑසනක
පිණි ඉහිච්ච
සුවද පිරුණු

සුදුම සුදු

පුංචි මලක්
නෙලාගෙන මා
සක්මන් කළත්
පුද භූමියට....

මටත් නොදැනිම
හොරින් රහසින්ම

නොකියා නොදන්වාම

ඩැහැගෙන ගොහින්

මගේ සුදු මල

පුද බිමට ආ

තවත් එක් උපාසකයෙක්....

ඔහු නෙලා ගත් ලෙසට
මගෙ පුංචි සුදු මල
ඔහුගේ අත මතින්
සතපවන්නේ ය ඔහු
මල් අස්න මත
නංවමින් හඬ
සාධු සාධු සාධු......

නෙලුවාට මම මල

පුද දෙන්නා ඔහු විය

කුසලයත් ඔහු නමටම විය..

පුද දුන්නාට පසුව

අත ගස්වා ගෙන
අනුමෝදනයට
මසිත ඉඩ නොදේ..

සමාවන්න !!!

පෘථග්ජන සිත් ඇත්තෙමි..

එබැවින් ,

පන්සල් බිම අතැර යමි...

Thursday, July 28, 2016

Prince බක බක

අනේ අපරාදේ
ඇයි දුන්නෙ
ආදරය පිරි
ලොකුම ලොකු හාදුවක්
කැතම කැත ගෙම්බෙක්ට?

රජ කුමාරයෙක්
වෙයි කියා හිතලයි
දුන්නෙ මම ඒ
ආලවන්ත හාදුව
සෙවල තඩි ගෙම්බාට.....

අනේ ගොම් වැස්සියේ
දුන්නාට හාදු
හැම ගෙම්බෙක් ම
වේවිද කුමාරයෙක්?

තොපිලා උම්බෑ
කියන තරමට
බක බක ගාන්නත්
ඉන්නට එපැයි
කස්ටියක්.........